بقالي فترة كبيرة مش بتكلم عن السينما و في منكم ناس لمحتلي و ناس هزقتني و ناس حلفت إنها مش هتخش على البلوج ثاني.. طبعا أنا مش بلومهم بس الفكرة الأولى و الأخيرة في البلوج ده إني أتكلم عن اللي عايز أتكلم فيه و ماهواش مبني على مايطلبه القراء (كما لمح أحد الناس اللي ردت)

على العموم لو إنت بتقرا الكلام ده فده معناه إنك لسه مهتم تقرا اللي أنا بكتبه و لازم أشكرك على ده و أتمنى إن اللي بيبقى نفسي أكتبه بييجي على هواك.. بيسليك أو بيفيدك أو بيخليك تتواصل على الأقل مع اللي أنا بقوله.

نيجي للمهم.. (زي النهاردة)

أول أفلامي الطويلة.. أول مشروع أشتغل عليه يزيد ميزانيته عن رقم يتكون من أربعة أرقام لرقم يحتوي على سبع أرقام.

أنا حالا كنت شغال على إعلان الفيلم.. لسة ماخلصتوش.. كل ما أخلصه أقعد أشتغل عليه ثاني.. كل ما بفرجه لحد من المقربين و مابحسش بالإنبهار في عنيه بعرف إني لسة موصلتش لآخر الطريق.. ربنا يسهل و أوصله قبل ما الفيلم ينزل.

طبعا خلصنا تصوير و مونتاج و شغالين دلوقتي على الصوت و المزيكا..

المزيكا أنا سمعت منها لحد نص الفيلم.. بيألفها هاني عادل (طالما وعدت الجميع أنه سيكون من أهم المغنين و مؤلفين المزيكا الغنائية و التصويرية في تاريخ مصر) و طبعا أنا بحمد ربنا إن إسمي كان مرتبط بأسمه على طول بسبب إخراجي لكذا فيديو لوسط البلد و ليه شخصيا و لأنه عملي كل مزيكات أفلامي القصيرة.. أينعم بنتخانق كثير على الشغل و حاجات بره الشغل بسبب إننا إحنا الإثنين عنديين زي الصخر بس برضه علشان أصحاب بقالنا فترة كبيرة و علشان إيماننا بموهبة بعض بنعدي بالصعوبات ديه.. و بوعد الناس بمزيكا تصويرية إنشاء الله جامدة جدا.. و أغنية أجمد من غناه هو شخصيا.

و في الصوت شغال عدد كبير من مهندسي الصوت و مصممين الصوت و على راسهم عمرو يحيى علشان يتعمل أول شريط صوت فيه تصميم حقيقي يضيف للدراما و يزودلها و اللي حاصل لحد دلوقتي أنا فخور بيه جدا الحمد لله.

و لسة مرحلة الجرافكس و الخدع و تلوين الفيلم من أول و جديد .. هنبدأ فيها قريب و برضه متحمسلها لأننا ناويين نلعب جامد في ألوان الفيلم برضه لتزويد معاني درامية معينة.. هتفهموها لما تشوفوا الفيلم إنشاء الله.

طبعا في مزيج رهيب من الحماس و محاولات توقع رد الفعل من الناس.. و تهييء نفسي لرد الفعل الإيجابي و السلبي.. لأن الإثنين فيهم خطورة.. الإيجابي بيخليك تتعمي و تطرش و تاخد ألم في نفسك و السلبي بيحبط و الذكاء إنك تسمع الكويس و تتبسط بيه و تنساه و تسمع الوحش و يخليه عامل محفز علشان تعمل أحسن الفيلم الجاي و تتعلم منه.

بصراحة التجربة عدت بسلاسة لم أكن متوقعها.. الناس كلها كانت متعاونة و متحمسة جدا.. (مش كلام برامج بتاع كلنا كنا أسرة واحدة و الهجص إياه) بس بجد الناس قطعت نفسها و هي مبسوطة.. كانوا مفكرني بمنتخب مصر في بطولة أفريقيا آخر واحدة .. على فكرة البطولة كانت شغالة وقت التصوير و ماكناش بنشوف معظم الماتشاط..

كل اللي شافوا الفيلم إتبسطوا.. تقريبا نصهم إنبهروا إن فيه حاجة مصرية إتعملت كده.. و النص عجبوا جدا.. و قلة قليلة كانوا عادي.. ماقالوش وحش بس قالوا حلو فاترة كده و دول كانوا إثنين تقريبا.. الباقي الحمد لله قالوا أكثر من الي كنت متوقعه بكثير.

كل الناس اللي إشتغلت في الفيلم بعد ما شافوه إتبسطوا جدا و معظمهم قال إن ده من أحسن الأفلام اللي عملوها و كلهم نفسهم نعمل سوا فيلم ثاني.

طبعا أنا هبان إني بشكر في فيلمي و بعمله دعاية بس بجد و الله ده اللي حصل بالظبط.. طبعا أنا على قد ما أنا مبسوط و متحمس عارف إن ده يمكن أقل من سبعين في المية من اللي كان في دماغي.. و على طول ببص لكل شوط و أقول ده كان ممكن يبقى أحسن.

ممكن الفيلم مايعجبكش و تشوف فيه مشاكل.. ممكن ماتصدقوش أو متحبوش.. أو يبقى بالنسبالك غثاء السيل حاجة تشوفها تنساها.. الموضوع أذواق.. بس على الأقل هبقى أنا متأكد إني عملت فيلمي مية في المية.. كنت صادق فيه و عملت فيلم فيه روحي و لو ماعجبكش يبقى مش هعجبك أنا كبني آدم.. و متأكد إني عملت كل اللي كان ممكن أعمله و عمري ماهندم لأني عارف إني ماسبتش حاجة ماعملتهاش.

و بجد مش كلام شكر على الفاضي.. و لو أفترضت بربنا خير و قلت إن الفيلم طلع كويس بالنسبة لي و لو هبقى مغرور و أعمي هقول إني السبب بالكثير بنسبة ثلاثين في المية من الفيلم و الباقي للناس اللي شالتني أولهم الإنتاج من الناحية الفنية قبل بكثير الناحية المادية.. و خصوصا حفظي.. أكثر من الفلوس قاعدات السيناريو اللي بدونها كان الفيلم هيبقى شبه حلقات المسلسلات اللي بتيجي على القناة الثامنة في الصيف.. بجد ساهم كثير في السيناريو.. و بعديه كل الناس اللي سفت التراب و طبقت الأيام و الليالي.. و الحمد لله إن ربنا وقعني في ممثلين و طاقم عمل ولاد ناس و محترمين خاليين من المشاكل النفسية و أتمنى إن كل الأفلام الجاية يبقى معايا ناس محترمة كده.

و الأهم إيمانهم بيك و بموهبتك ده البنزين اللي بيخليك تثبتلهم إنهم مش غلطانين لما آمنوا بيك و وثقوا فيك..

توقعوا نزول الفيلم السنة ده إنشاء الله.. و لو ربنا سهل ممكن قبل العيد الكبير.. شوفوا الفيلم مرة أو أكثر إنتم حرين.. لو مش عايزين تشوفوها برضة تمام.. بس إشتروا تذاكر كثير.. كل تذكرة زيادة هتساهم في الفيلم اللي بعده.. J

أخيرا.. بوعد للمرة الثانية.. هكتب بالتفصيل عن كل اللي إتعلمته في صناعة فيلمي الأول.. علشان لو فيه ناس ممكن تستفيد منها..

إدعولي.. و من لا يحب الدعاء يتمنالي “حظا سعيدا”