كل ما أقابل أي حد.. من الصحفيين للناس اللي بشوفهم في أي حتة لحد مسؤول الأمن في عمارتنا بيسألني نفس السؤال ده .. خصوصا بقى لما يسألني قبلها "هو إنت خريج إيه؟ معهد فنون مسرحية؟" فأرد "على فكرة اللي بيعلم إخراج السينما معهد سينما مش معهد فنون مسرحية.. بس أنا برضة مش خريجه.. أنا خريج تجارة" فيفتح بقه.. "أمال إتعلمت إخراج إزاي؟ أخدت كورسات؟"  "آه بس للأسف أخدت واحد و مكملتوش" .. "الله!! أمال إتعلمت إخراج إزاي" فأقوم رادد و أنا حاسس إني بدافع عن نفسي في محكمة.

ده غير كده إني إتفاجئت بحاجة مهمة قوي الفترة اللي فاتت.. إني لقيت كذا حد بيبعتلي أو بيقللي إنه – أو إنها – كان مقتنع إنه لا يمكن يخرج و هو مادرسش و لما لقاني عملت فيلم و عجبه أخد قرار إنه يبدأ ياخد الموضوع بجدية.. و حسيت بمسؤولية إنك مثل لناس كثير.. بيسألوني كثير عن الخطوات الي أخدتها علشان أخرج من غير ما أكون إتعملت بطريقة أكاديمية أو أشتغلت مساعد مخرج أو كنت "إبن أخت حد في الوسط”.

طبعا أنا هقول هنا اللي عملته بس طبعا لازم مانكرش إن يمكن كان في مقدار من الحظ إني قابلت ناس ولاد حلال وقفوا جمبي.. و مقدار كبير من توفيق ربنا ليا.. و مقدار أكبر من دعوات الحاجة و الحاج :).. بس برضه الفرصة لا تأتي إلا لمن يستحقها..

أخش في الموضوع بالتفصيل بقى.. و لو مش من إهتماماتك إنك تبقى مخرج ماتكملش قراية الكلام ده علشان هتحسه ممل و أنا خايف على وقتك.

هقسم الموضوع لثلاث حاجات.. الفرجة و التجربة و القراية.. لإن ده الخطوات اللي أخدتها بالترتيب.

أولا الفرجة:

طبعا قصدي بالفرجة المشاهدة مش حاجة ثانية لأي حد قراها غلط.

الموضوع بدأ معايا بالصدفة بعد ثانوية عامة.. أمي عملت فينا خدمة و إشتركنا في قناة الإم نت اللي تحولت بعد كده للموفي شانيل اللي في باقة شو تايم.. القناة ديه كانت مش بس بتعرض الأفلام التجارية الأمريكية.. كانت كمان بتعرض أفلام أوروبية و كمان الأفلام المستقلة الأمريكية اللي ماكنتش بتلاقيها في نوادي الفيديو و طبعا ماكنتش بتيجي في نادي السينما.. و كان حبي في الأول للقناة علشان أبقى صريح إنها كانت بتعرض الأفلام من غير قطع.

و أفتكر إن أول فيلم سحرني بطريقة ملحوظة هو "إفتح عينيك" الأسباني.. و بعده "القرود الإثنى عشر" و بعده حب عمري "نادي الشغب" – بكره ترجمة أسامي الأفلام – المهم ..

ساعتها فهمت إن فيه بني آدم مهم ورى الفيلم و هو المخرج و تحول الفيلم من فيلم لبراد بيت لفيلم لديفيد فينشر و فيلم بروس ويليز لفيلم تيري جليام.. و ساعدني في المعرفة ديه أهم موقع لمعلومات الأفلام

imdb.com

و من كثر الفرجة – ساعات أربع أو خمس أفلام في اليوم – بدأت أميز إن ده فيلم حلو.. ده فيلم معمول بالطلب و ده فيلم سلق بيض و ده فيلم هندي و ده فيلم عربي.

و بدأت أحسن من ذوقي بسبب كثر الفرجة.. و علشان أبقى دقيق بدأت أتبنى ذوق و أختار ذوق لنفسي.. لإن مش معنى إني أختار ذوق إنه الأحسن في العموم.. بس إختارت الذوق اللي أثر فيا أكثر واحد.

و لقيت نفسي بحب السينما الأسباني أكثر، و الكوري و الفرنساوي و طبعا الأمريكاني – حتى لو كره الكارهون – لإني إكتشف في السينما الأمريكاني خصوصا لغة مخاطبة في السرد عالمية و مهتمة جدا بالتواصل مع المتفرج و وضعه في نصف الحدث.. و لقيت في الكوري نفس الحاجات ديه بس معاها روح مغامرة و حاجة بيسموها قيمة الصدم.. و هو إنه يصدمك بأحداث عنيفة و مناظر عنيفة.. (ترجيع، دم، ضرب غير آدمي، أب بيغتصب بينته، معارك دامية) و لقيت في الأسباني الإهتمام بكل عناصر الفيلم بشكل فني جدا فيه تجربة و إبتكار و لقيت في الفرنساوي مشاعر جميلة و راقية و حلوة.

حسيت إني مشاهد محترف و بقيت مهتم بمعرفة كل حاجة عن الفيلم عن طريق الإنترنت.. و ساعتها لقيت حوارات على النت لكل المخرجين اللي بحبهم و كلهم إتكلموا عن حاجة مهمة جدا علمتهم الصنعة و هي..

ثانيا: التجربة.

لقيت معظم المخرجين اللي حبيت أفلامهم ماتعلموش السينما في معاهد أو كليات.. و بقم مثل أعلى ليا.. كلهم قالوا إنهم إتعلموها من التجربة و الخطأ و التعلم من الخطأ..  و كلهم عندهم حكاية بتبدأ بالجملة ديه " و أنا صغير أبويا/خالتي/عمتي/جدتي/صحبتي جابتلي كاميرا سوبر ٨ – ديه بالنسبلهم كانت زي الهاندي كام دلوقتي- و كنت بعمل أفلام في بيتنا مع إخواتي و بدأت أتعلم بيها الإخراج"

و كلهم كانوا بينصحوا بإنك تتعلم إنك تجرب تصور و تركب فيلمك و توريه للناس و تتعلم من آرائهم.. و جيمس كاميرون – مخرج تايتانيك و تيرميناتور – قال لو عايز تبقى مخرج أتعلم في معهد السينما بس لو عايز تبقى مخرج مختلف ماتتعلمش في معاهد و جرب مع نفسك.

و عملت كده و عملت أفلام كثير بالهاندي كام و عملتلها مونتاج على كومبيوتر البيت العادي ببرنامج الأدوب بريميير اللي برضه إتعملته بالتجربه كده و من المساعدة بتاعت البرنامج.

طبعا كانوا زي الزفت.. بس كل ما كان الفيلم أوحش كل ما علمك أكثر.. أول فيلم علمني أهتم بالصورة و ثاني واحد علمني أهتم بالمونتاج و ثالث فيلم علمني أهتم بحركة الكاميرا و آخرهم علمني أهم درس و هو إن أهم حاجتين هما القصة و التمثيل و بعد كده كله ييجي بعدهم .. و التسجيلي علمني التواصل مع مشاعر المتفرج.

و أهم ميزة للتجربة كانت إني كنت بفرج أفلامي للمنتجين و ده اللي خلى أي منتج عجبه شغلي متحمس إنه يعملي حاجة.. بس اللي خلاني مستعد لعمل فيلم طويل بجد هو..

ثالثا: القرائة.

القراية بصراحة أكثر و أهم حاجة علمتني.. أهم قراية فادتني كانت القراية عن فن و حرفة كتابة السيناريو و ثانيا فن توجيه الممثل للسينما مش للمسرح أو بالطرق القديمة ثالثا عن حرفة التحكم في كل أدوات الإخراج من صورة و ألوان و حركة كاميرا و الأبعاد و العمق و التسطيح و الديكور و المزيكا و المونتاج .. إلخ، و الكتب الي فيها حوارات مع مخرجين و بيتكلموا فيها عن طرقهم و ستايلاتهم أو اللي بتوثق مشوارهم و اللي مروا بيه.

و هقول هنا بسرعة أسامي الكتب و اهم حاجة كل كتاب بيعملها.

الكتب ديه كلها إشتريتها من على الإنترنت عن طريق موقع
amazon.com

رحت عملت في البنك حاجة إسمها إنترنت كارد بتحط فيه المبلغ اللي عايز تشتري بيه بس و الموضوع أمان جدا و الكتاب بيجيلك لحد البيت و بيبقى نفس سعره لو بيتباع في مصر تقريبا.

أولا كتب السيناريو:

Screenplay: The Foundations of Screenwriting by Syd Field

كتاب مكروه لإنه بيعلم الطبخة الأمريكية لبناء الفيلم.. بس مهم جدا كبداية

Story: Substance, Structure, and The Principles of Screenwriting

بيعلم فن حكي القصص في المطلق و خصوصا في الأفلام.. يمكن أهم كتاب لأهم واحد بيعلم فن كتابة السيناريو في العالم.

The Writers Journey: Mythic Structure for Writers, 3rd Edition by Christopher Vogler

كتاب مهم جدا بيبين الخواص المشتركة لكل السيناريوهات الناجحة.

Making a Good Great by Linda Seger

بيخليك تحدد مشاكل السيناريو و إزاي تحلها علشان لما تيجي تعيد تظبيط الكتابة.

ثانيا كتب التمثيل:

Directing Actors: Creating Memorable Performances for Film & Television by Judith Weston

ده في رأيي أعظم كتاب عن توجيه الممثل موجود دلوقتي.. لازم لازم يقراه أي مخرج مهتم بالتمثيل و بتوجيه الممثل علشان يطلع أحسن ما عنده.

ثالثا كتب الإخراج

Film Directing: Shot by Shot: Visualizing from Concept to Screen (Michael Wiese Productions) by Steven Katz

Film Directing: Cinematic Motion, Second Edition by Steven D. Katz

Cinematic Storytelling: The 100 Most Powerful Film Conventions Every Filmmaker Must Know by Jennifer Van Sijll

دول كتب مهمة لمعرفة المبادئ الأساسية جدا اللي تخليك تتفادى الأخطاد الإخراجية..

The Visual Story, Second Edition: Creating the Visual Structure of Film, TV and Digital Media by Bruce Block

في رأيي ده أهم كتاب عن الإخراج و أدوات الإخراج.. كتاب عبقري ملم جدا.

رابعا كتب التصوير

The Five C’s of Cinematography: Motion Picture Filming Techniques by Joseph V. Mascelli

كتاب مهم للمخرج علشان يفهم التصوير و القطعات.

خامسا كتب السير الذاتية

دول مهمين قوي و كثير قوي و أنصح إنك تجيبهم على حسب المخرجين اللي بتحبهم و بتحب أفلامهم  إنت بس دور على أمازون بأسم المخرج اللي بتحبه و هتلاقي الكتب اللي بتتكلم عنه أو عاملا معاه حوارات.

طبعا في مليون كتاب ثاني بس في رأيي دول أكثر كتب فادتني.

أنا كده تقريبا نقلتلكم تجربتي زي ما أنا فاكرها.. إتفرج كويس و نقي اللي بتتفرج عليه.. جرب و إغلط و إتعلم من غلطك.. إقرا كثير و طبق اللي بتقراه.. و إنشر علمك لغيرك.. و إدعيلي معاك.