و بهتم قوي بترتيبهم.. و بإعادة ترتيبهم كل ما إستجد مستجد.

و ده رأيي الشخصي جدا.. و الدنيا أذواق و لولا إختلاف الأذواق لقتل الناس بعضهم علشان يتجوزوا بينولوبي كروز.. و علشان كده نفسي تشاركوني بآرئكم و بقوايمكم الخاصة.. مهتم أعرف ترتيبكم بس بشرط تكتبوا الأسباب زي ما هعمل دلوقتي و أرغي و أضيع وقتكم.

الأول: دانييل داي ليويس

أنا كان ليا رأي بسيط.. المفروض بعد ما عمل فيلم (رجلي الشمال)
my left foot
و أخذ عليه أوسكار أحسن ممثل كانوا يلغوا الجايزة بعدها.. بجد أنا ماكنتش مصدق عينيا.. الراجل ده عبقري.. الفيلم كله طالع مشلول مش بيحرك إلا رجله الشمال بس.. و كمية تمثيل بقة عبي و شيل.. و طبعا دوره في فيلم
gangs of new york
اللي الناس كلها كانت طالعة من الفيلم فاكراه و ناسية كل حاجة ثانية.. و أخيرا دروه اللي أخذ عليه أوسكار برضه في فيلمه الأخير
there will be blood
المخرج حكى إنه قعد معاه حوالي ثمن تشهر لوحدهم في فندق في أوضة سوا بيفكروا مع بعض في الشخصية و بيعيدوا كتابة الفيلم و بيطلعوا تفاصيل.. ثمن تشهر.. هنا تسمع إن الفيلم الفلاني بدأ يتكتب و بعد ثلاث تشهر تلاقيه في السينما.. اللي هي حاجة خارقة لقوانين الطبيعة أصلا.

الثاني: بين كنجسلي

السبب مش بس غاندي اللي إبدع فيه و خلانا كلنا لما يتقال كلمة غاندي نفتكره هو و مانفتكرش غاندي الأصلي.. السبب الحقيقي بالنسبة لي فيلم ثاني و هو
the house of sand and fog
طالع فيه راجل إيراني كان عميد في الجيش الإيراني و عايش في أمريكا و بيتخانق على بيت.. الفيلم كان ممكن بسهولة يتحول لفيلم تليفزيوني ييجي في برنامج حدث بالفعل.. و لكن بسبب سيناريو و إخراج محبكين و عليهم تمثيل عبقري منه تحول لمعجزة.. ليه مشهد في الفيلم ده مش عايز أحرقه للي ماشفش الفيلم بس أثبت فيه إنه مليء بمواهب لم يسبق لها مثيل.. كل الممثلين عيطوا.. بس في الفيلم ده أديله جايزة أحسن “تعييطة” لممثل شفتها على الشاشة.

الثالث: خابيير بارديم

زي ما عادل إمام بيعز الغموس – للي شافوا مدرسة المشاغبين – أنا بعز قوي الممثل اللي بيتغير جلده في كل دور.. و مش بيغير جلده اللي هو بيعمل نيو لوك و لا يعملي حركتين مقفوشين.. لأ فعلا ماتبقاش مصدق إن ده هو نفسه ده.
الدور اللي أكدلي عبقريته هو دوره في فيلم
the sea inside
الفيلم أسباني إتكلمت عليه مليون مرة و هو كان عامل فيه شخصية راجل حقيقي كان مشلول برضه، بس أنا بقدسله الدور له لكذا سبب.. أولا إني لما شفت الديفي دي لقيته بيقول إنه راح قعد في حتة معينة في أسبانيا عدة شهور علشان يسبك اللهجة.. برضه عدة شهور.. مش الواحد من دول يسأل المساعد بتاعه يقوله “التصوير إمتى؟” يقوم المساعد قايله “بكره الصبح يا أستاذ”.. مش ده المهم.. ده ولا حاجة.. المهم إنه راح مستشفى و قعد ثلاث تشهر كإنه مشلول.. مش بيحرك حاجة في جسمه.. علشان برضه يسبك الدور.. تخيل ممثل ثاني ممكن يروح يعيش كام شهر كإنه مشلول علشان دور.. الأهم بقى كمان هو الإختيار.. إنه رجع يعمل ده في أسبانيا بعد ما نجمه بدأ يعلي في أمريكا و إترشح للأوسكار على فيلم قبله كان بيتكلم فيه بالإنجليزي.. و الأهم و الأهم إنه مع إنه واحد من أوسم رجال الأرض طلع شكله عنده ستين سنة و بكرش و حالق شعره زي حسن عابدين..
غير كده إنه لما تشوفه في فيلمه اللي إترشح فيه للأوسكار الأولاني
before night falls
تلاقيه عامل دور الشاذ جنسيا بطريقة واقعة جدا و تقول أكيد ده شاذ جنسيا.. و تلاقيه في فيلم
vicky christina barcelona
عامل دور راجل حرمجي وسيم ماتصدقش إن ده هو ده.. و تشوفوا في فيلم
no country for old men
تخاف كل ما يطلع علي الشاشة و ماتقدرش تتنفس.. التحضير السليم و التفاني و حب المهنة هما السبب.. و ربنا يهدي.

الرابع: هيث ليدجر

طبعا إذكروا محاسن موتاكم.. الراجل ده كان لازم يموت فعلا بعد فيلم
dark night
كان هيعمل إيه بعد الدور ده؟ جاك نيكلسون – اللي مش بحبه حتى لو عمل دور كلب بلدي و ماحدش يوجعلي دماغي – كان بيسب و بيلعن قبل الفيلم و بيقول إزاي حد يعمل الجوكر بعدي؟ ده أنا الجوكر! ده أنا إله التمثيل! ده أنا بنف في ورقة الميت دولار! و أكيد إتكبس كبسة عمره لما لقى هيث ليدجر عمل أحسن تمثيل و أحسن أداء في تاريخ التمثيل من وجهة نظري و من وجهة نظر نقاد كثير.. و كسب الجولدن جلوب و مستعد أراهن إنه هيكسب الأوسكار، و لو مكسبهاش هروح أفجر نفسي في حفلة الأوسكار – بهرج طبعا – لإن اللي عمله ماتعملش.
المهم إن كريستوفر نولان المخرج قال إن معظم تفاصيل الشخصية كانت من عند هيث ليدجر نفسه.. زي فكرة إنه كل شوية يلحس في جمب بقه بطريقة غريبة، و زي إنه كل شوية يقول حكاية مختلفة عن إزاي جاله الجرح اللي جمب بقه.
طبعا قبل الدور كان ممثل كويس ماعملش المستحيل.. بس قبل ما يموت ودع الدنيا بأورع تمثيل و بأروع دور.

الخامس: براد بيت

أقل ممثل متقدر من النقاد.. و أعتقد ده بسبب إنه أكثر ممثل متقدر من الناس.. أنا مقدره لسببين مهمين.. إنه مش عايز يبقى الواد الأمور ده أولا.. و بيدور على الأفلام الحلوة اللي فيها أدوار فيها تحدي بجد.. هو اللي راح لجاي ريتشي و قاله إنه عايز يطلع معاه في فيلم
snatch
بعد ما شافله فيلمه الأول.. و في فيلم
seven
كان هيسيب الفيلم لما عرف إنهم بيفكروا يخلوا النهاية أقل سوداوية.. لما شاف الفيلم الهونج كونجي الأصلي لفيلم
departed
إشتراه علشان ينتجه من غير مايمثل فيه.. في فيلم
fight club
اللي عمل فيه أحسن أدواره من وجهة نظري، عجبه الفيلم بس ماعجبوش الشخصية، و علشان هو و ديفيد فينشر أناتيم جابه هو و اللي كتب
seven
آندي كيفين واكر و قعدوا عنده في البيت سنة يكتبه الشخصية و الفيلم من جديد.. مش علشان يكبر دوره أو علشان صورته تكبر ع الأفيش.. بس علشان يخلي الدور إستفزازي ليه..

السادس: فيليب سايمور هوفمان

برضه حرباية.. متغير بشكل غريب.. و الأهم من كده إنه مغامر جدا.. يعني إزاي غير صوته و عمل دور الشاذ برضه في كابوتي.. الشخصية الحقيقية اللي أبدع فيها.. و تلاقيه في كل فيلم يعمل دور أصغر من اللي قبله بس تلاقيه مبدع و تستناه يطلع علي الشاشة و بسهولة بيحرج الممثلين الي حوليه.. و اللي بحييه عليه هو إنه مش علشان إشتهر علي كبر – زي سامويل جاكسون و كذا ممثل مصري إنتم أكيد عارفينهم – مابقاش بيلعب في السليم و يعمل الحركتين بتوعه في كل فيلم علشان ياكل بيهم عيش.. لأ بيخاطر كإنه لسة بيتعلم تمثيل و كأنه عنده رصيد مابيخلصش عند المتفرج.

السابع: ليوناردو ديكابريو

المكروه من الشيوعيين و المثقفين و النقاد علشان وسيم و عمل تيتانيك.. مع إنه لازم يحترم علي إنه بيحاول برضه يطلع من القالب ده بكل جهده و لازم نستفيد درس مهم من مشواره و هو الإختيارات.. إختياراته لأفلامه مش بتجلي.. معظم أفلامه أفلام مهمة و حلوة جدا.. و ده مش علشان هو ربنا مسهلها معاه في حادي بادي أو علشان عنده حاجة بتدعيله في صلاة الفجر إن ربنا يوقف في طريقه سيناريوهات و مخرجين ولاد حلال.. بس علشان أكيد ده واحد فاهم حرفة سيناريو فبيعرف يقرا بجد.. و بيفهم حرفة إخراج يعرف يقول ده مخرج جامد أشتغل معاه و ده لأ.

الثامن و الأخير: أحمد ذكي

لولا خوفي من المبالغة كنت حطيته بعد دانييل داي ليويس على طول أو ممكن معاه.. تعرفوا ممثل عمل ظابط ثلاث مرات – زوجة رجل مهم، الباشا، أرض الخوف – و كل مرة بني آدم ثاني كده؟ حد يعمل الصعيدي – الهروب، البيه البواب – و بجد مافيش أي علاقة حتى لهجة الصعيدي ده غير ده.. حد قلد الشخصيات الحقيقية بالمنظر ده؟ عبقري بجميع المقاييس و كنت أتمني لو كانت حياته مريحة أكثر مما كانت عليه و ماكنش عانى كل المعاناة النفسية و الجسدية ديه.. الله يرحمه بجد و يا رب يرزقنا بحد زيه ثاني.. و أنا متفائل جدا بناس كثيرة زيه جايين في السكة.

إكتبوا قوايمكم إنتم كمان عايز أقراها.