و الله انا مش عارف السبب إني بدأت أعمل بلوج أو مدونة زي ما الناس ترجمتها

بس ديه ممكن تكون فرصة لإني اشارك عدد أكبر من الناس تجربتي في مجال الإخراج و صناعة الصورة بشكل عام

بداية علشان أعرفكم بنفسي، انا إسمي عمرو سلامة مخرج او حكواتي  الصورة و ده أحسن ترجمة للقب اللي إخترتوا لية بعد عناء و هو

A Visual StoryTeller

و السبب ورى إختيار لقب غريب زي ده هو إني كنت عايز لقب يلم كل الأعمال اللي بقوم بها حي إنني بخرج و بكتب و بمنتج و شغال على الخدع و كمان بعمل أفكار لإعلانات و أغاني

و أتمنى إني أكون قد اللي انا بقوله و بعرف أعمل الحاجات ديه كلها كويس

و هستخدم البلوج ده علشان أحكي فيه تجاربي المتواضعة القديمة منها و الجديدة في صناعة السينما و الصورة و هحاول على قد ما أقدر مكتبش حجات شخصية أكيد هتكون مملة و اتمنى إن الناس اللي مهتمة بالسينما تلاقي هنا حاجات ظريفة ممكن يستفادم منها

و المشاريع اللي انا شغال عليها دلوقتي هي

أولا فيلمي الروائي الأول و إسمه المبدئي (آخر الخط) و هو من تأليفي وبمساعدة الكاتب الكبير محمد حفظي و المنتج محمد عبد القدوس و الفيلم من إنتاج شركة فيلم كلينيك

ثانيا مسلسل ضخم مبني على سلسلة كتب عربية شهيرة و لكن الموضوع مازال في طي الكتمان و سوف أنشر معلومات أكثر عنه في الوقت المناسب

ثالثا أقوم على تأسيس شركة جديدة متخصصة في إنتاج الأفلام التسجيلية

رابعا كتابة بعض الأفلام الطويلة بمساعدة أصدقائي الكتاب الموهوبين مثال (محمد المعتصم، حازم ويفي، محمد ناير و احمد فهمي) و سأنشر معلومات أخرى شوية بشوية

اتمنى إنكم تلاقوا البلوج بتاعي مسلي و مفيد و تزوروه على طول و على طول تبعتولي آرائكم و مقترحاتكم اللي أكيد أكيد بتفيدني

عمرو سلامة